ယေရှုသည် ဒါဝိဒ်အမျိုးအနွယ်မှ အပျိုကညာ၏သားဖြစ်သလော။

‘ခရစ်တော်’ ဟူသော အမည်နာမသည် ဓမ္မဟောင်းကျမ်းမှ ဆင်းသက်လာခြင်းအကြောင်းကို ကျွန်ုပ်တို့ ဖော်ပြပြီးဖြစ်သည် ။ ဒါဆိုရင် အခုဒီမေးခွန်းကို သုံးသပ်ကြည့်ရအောင်- နာဇရတ်မြို့မှ ယေရှုသည် ဓမ္မဟောင်းကျမ်းတော်လာ ‘ခရစ်တော်’ ဟုတ်ပါသလား။

ဒါဝိဒ်မျိုးနွယ်မှ ဆင်းသက်လာခြင်းအကြောင်း

ဆာလံကျမ်းရေးသားသူ ဒါဝိဒ်အကြောင်း သမိုင်းကြောင်းတွင် ဖော်ပြထားပုံ

သခင်ယေရှုမမွေးဖွားမီ နှစ်ပေါင်းတထောင်က ရေးသားခဲ့သော ဓမ္မဟောင်းကျမ်းတခုဖြစ်သည့် ဆာလံ ၁၃၂ တွင် တိကျသောပရောဖက်ပြုချက်တစ်ခုပါရှိသည်။ ယင်းပရောဖက်မှာ

¹⁰ကိုယ်တော်၏အစေအပါး ဒါဝိဒ်၏မျက်နှာကိုထောက်၍ ကိုယ်တော်ဘိသိက်ပေးထားသောသူကို ငြင်းပယ်တော်မမူပါနှင့်။ ¹¹ထာဝရဘုရားသည် ဒါဝိဒ်အား သစ္စာနှင့်ကျိန်ဆိုပြီး ပြန်လည်ရုပ်သိမ်းတော်မူမည်မဟုတ်သောစကားမှာ “ငါသည် သင်မှပေါက်ဖွားသောရင်သွေးတစ်ဦးကို သင်၏ရာဇပလ္လင်ပေါ်ထိုင်စေမည်။” (ဆာလံ ၁၃၂:၁၀-၁၇)

သခင်ယေရှုမမွေးဖွားမီအချိန်ကတည်းက ဘုရားသခင်၏ ရွေးမြှောက်ခြင်းခံရသောသူ (တနည်းအားဖြင့် ‘ခရစ်တော်’) သည် ဒါဝိဒ်မျိုးနွယ်ထံမှဆင်းသက်လာမည်ဟူသော အကြောင်းကို ဆာလံကျမ်းများက ဟောကိန်းထုတ်ခဲ့သည် ။ ထို့ကြောင့်ပင် ဓမ္မသစ်ကျမ်းများက ယေရှုသည် ဒါဝိဒ်၏မျိုးရိုးမှဆင်းသက်လာကြောင်းကို ဖော်ပြထားခြင်းဖြစ်သည်။ တနည်းအားဖြင့် ယေရှုသည် ကျမ်းဟောင်းမှ ဟောကိန်းလာ ပုဂ္ဂိုလ်ဖြစ်ကြောင်းကို ညွှန်းဆိုနေခြင်းဖြစ်သည်။

ဓမ္မသစ်ကျမ်းသည် ၎င်း၏ပထမအခန်းငယ်တွင်ဤအပိုဒ်ဖြင့် အစပြုထားသည်။

(‭‭ရှင်မဿဲခရစ်ဝင်‬ ‭၁:၁)

ယေရှုသည် အမှန်တကယ်ကိုပင် ဒါဝိဒ်၏မျိုးရိုးမှ ဆင်းသက်လာပါသလား။

သို့သော် ဤကျမ်းတော်များသည် ယေရှုအား ပရော်ဖက်လာဖြစ်ကြောင်းကို သက်သေပြရန်အတွက် မျိုးရိုးစဉ်ဆက်ဇယားကို ဖန်တီးပြုပြင်ထားခြင်းမဟုတ်ကြောင်း ကျွန်ုပ်တို့ မည်သို့သိနိုင်မည်နည်း။ ယင်းကျမ်းကိုရေးသားသူတို့သည် ယေရှုကို စာနာနားလည်ကြပြီး အမှန်တရားကို ချဲ့ကားရေးသားလိုစိတ်ရှိနိုင်သည် မဟုတ်ပါလော။

ဖြစ်ရပ်တခု၏ အမှန်တရားကို ရှာဖွေသောအခါတွင် ရန်လိုသောသက်သေများ၏ ထွက်ဆိုချက်သည် အခရာကျပေသည်။ ရန်လိုသောသက်သေများဆိုသည်မှာ ဖော်ပြပါဖြစ်ရပ်၏ အချက်အလက်ကို ထွက်ဆိုနိုင်သော်ငြား ယင်းဖြစ်ရပ်၏ ဇာတ်ကြောင်းအပေါ်တွင် သဘောတူညီချက် မရရှိသူများဖြစ်ကြသည်။ ဥပမာဆိုရသော် လူပုဂ္ဂိုလ် ‘က’ နှင့် လူပုဂ္ဂိုလ် ‘ခ’ တို့သည် ယာဥ်တိုက်မှုဖြစ်ပေါ်ကြသည်။ နှစ်ယောက်စလုံးသည် ဖြစ်ရပ်ကို လက်တွေ့ကြုံတွေ့ခဲ့ရပြီး တဦးအပေါ် တစ်ဦး အပြစ်ရှိသည်ဟူသော ဇာတ်ကြောင်းကို ဖော်ပြလိုသောကြောင့် ယင်းတို့နှစ်ဦးကို ရန်လိုသောသက်သေများဟု သက်မှတ်နိုင်သည်။ ‘က’ မှ ‘ခ’ သည် ယာဥ်တိုက်မှုမဖြစ်ခင် ဖုန်းတွင် စာရိုက်နေသည်ဟု ထွက်ဆိုသည်၊ ‘ခ’ မှလည်း ဤအချက်အလက်သည် မှန်ကန်သည်ဟု ဝန်ခံသည်။ ထို့ကြောင့် ကျွန်ုပ်တို့သည် ဤယာဥ်မတော်တဆမှုတွင် ‘ခ’ စာရိုက်နေသော အချက်အလက်သည် မှန်ကန်ကြောင်း သိမြင်နိုင်သည်။ အဘယ့်ကြောင့်ဆိုသော် ‘ခ’ အနေဖြင့် ဤအချက်အလက်အပေါ် ဝန်ခံမှုသည် သူလိုလားသော ဇာတ်ကြောင်းကို အထောက်အအပံ့ မပေးနိုင်သောကြောင့်ဖြစ်သည်။

အလားတူပင် သမိုင်းအစဥ်အလာအရရန်လိုသောသက်သေများ၏ မှတ်တမ်းများကို ကြည့်ရှုခြင်းဖြင့် ယေရှု၏ မျိုးရိုးနှင့်ပတ်သတ်သော အမှန်တရားကို သိရှိနိုင်သည်။ ဓမ္မသစ်ကျမ်းပညာရှင် ဒေါက်တာ F.F. Bruce က ဂျူးရဗ္ဗရည်ညွှန်းချက်များဖြစ်သည့် Talmud နှင့် Mishnah တွင်ပါဝင်သော ယေရှုနှင့်ပတ်သတ်သည့် အကြောင်းအရာများကို လေ့လာရာတွင် အောက်ပါမှတ်ချက်ကိုရေးသားခဲ့သည်။

Ulla ကပြောသည်- သင်တို့အနေဖြင့် ယေရှုအပေါ် စိတ်အားထက်သန်သော ခုခံကာကွယ်မှုများ ပေါ်လာလိမ့်မည်ဟု ယုံကြည်မည်လော။ သူသည် လှည့်ဖြားသူဖြစ်ပြီး မဟာကရုဏာရှိသူက လှည့်ဖြားသူများကို ‘သင်သည် ထိုသူကို မလိုက်လျောရ။ နားမထောင်ရ။ မသနားရ။ မညှာတာရ။ အကာအကွယ်မပေးရ။’ [တရားဟောရာကျမ်း ၁၃:၉] ဟုဆိုထားသည်။ သို့သော် ယင်းဟောပြောချက်များသည် ယေရှုအပေါ်မသက်ရောက်။ အဘယ့်ကြောင့်ဆိုသော် သူသည် ရှင်ဘုရင်နှင့် နီးသော ကြောင့် ဖြစ်သည် ” p. 56

F.F. Bruce သည် ထိုရဗ္ဗိစကားနှင့် ပတ်သက်၍ ဤမှတ်ချက်ကို ရေးထားသည်။

သရုပ်ဖော်ပုံမှာ ရဗ္ဗိတို့သည် ခရစ်ယာန်များအပေါ်တွင် စာနာစွာဖြင့် ယေရှုအတွက် ခုခံကာကွယ်ရန် ကြိုးပမ်းခဲ့ကြခြင်းဖြစ်သည်။ အဲဒီလို ရာဇ၀တ်မှုတွေနဲ့သူကို အကာအကွယ်ပေးဖို့ ဘာကြောင့် ကြိုးစားကြတာလဲ။ အကြောင်းမူကား၊ ယေရှုသည် ဒါဝိဒ်၏ ‘ဘုရင်’ မျိုးနွယ် နှင့် နီးသောကြောင့်ဖြစ်သည်။ p. 57

တစ်နည်းဆိုရသော်၊ ခရစ်ယာန်တို့နှင့် ရန်လိုသောသက်သေများဖြစ်ကြသည့် ဂျူးရဗ္ဗိများက ခရစ်ဝင်ကျမ်းရေးသူများ၏ပြောဆိုချက်ဖြစ်သည့် ယေရှုသည် ဒါဝိဒ်မျိုးနွယ် ထံမှဖြစ်ကြောင်း ကို မငြင်းခုံခဲ့ပေ။ သူတို့သည် ယေရှု၏ ‘ခရစ်တော်’ ဖြစ်မှုကို နှင့် ဓမ္မသစ်ကျမ်း၏ ယေရှူသည် ‘ခရစ်တော်’ ဖြစ်သည်ဟူသော အဆိုပြုချက်ကို ဆန့်ကျင်ခြင်းသာဖြစ်သည်။ သို့သော် ယေရှုသည် ဒါဝိဒ်၏ တော်ဝင်မိသားစုထဲတွင်ရှိနေကြောင်းကိုမူ လက်ခံဝန်ခံထားသည်။ ထို့ကြောင့် ရန်လိုသောသက်သေများ၏ ဝန်ခံမှုအရ ကျွန်ုပ်တို့အနေဖြင့် ကျမ်းသစ်ရေးသားသူများသည် ချဲ့ကားကာ ယေရှူ၏ ပရော်ဖက်လာမျိုးနွယ်ဆင်းသက်မှုကို ဖန်တီးရေးသားထားခြင်း မဟုတ်ကြောင်း သိမြင်နိုင်သည်။

ယေရှုမွေးဖွားခြင်းကို သရုပ်ဖော်သည့် နံရံဆေးရေးပန်းချီ၊ Rosary Basilica၊ Germany_{^{WorldKnowledge0815, CC BY-SA 3.0 DE, via Wikimedia Commons}}

ယေရှူသည် အပျိုစင်မှ မွေးဖွားလာပါသလား။

သမိုင်းကြောင်းတလျှောက်တွင် တခြားသော ဒါဝိဒ်၏ တော်ဝင်မိသားစုမှ ဆင်းသက်လာသူမျာလည်း ရှိသေးသောကြောင့် ယေရှုသည်လည်း ဆာလံပါ ပရောဖက်ပြုချက်ကို ‘မတော်တဆ’ ပြည့်စုံစေခဲ့ခြင်း ဟူသော ဖြစ်နိုင်ခြေရှိသေးသည်။ သို့သော်ငြား အပျိုကညာမှ ဖွားမြင်ခြင်းဟူသော အဆိုပြုချက်ကာ ‘မတော်တဆ’ ဖြစ်သွားနိုင်ခြေ မရှိပါ။ ယင်းအဆိုပြုချက်သည်-

နားလည်မှုလွဲခြင်း
လိမ်လည်ခြင်း၊ သို့မဟုတ်
တန်ခိုးလက္ခဏာဖြစ်ခြင်း တို့မှလွဲ၍ အခြားသော ဖြစ်နိုင်ချေများမရှိပါ။

အာဒံ၏ကမ္ဘာဦးမှတ်တမ်းတွင် အပျိုစင်မှရင်သွေး မွေးဖွားခြင်းကို အရိပ်အမြွက်ဖော်ပြခဲ့သည်။ ဓမ္မသစ်ကျမ်းတွင်လည်း လုကာနှင့် မဿဲက မာရိသည် အပျိုစင်ဘဝတွင် ယေရှုကို ပဋိသန္ဓေယူခဲ့ကြောင်း ရှင်းလင်းစွာဖော်ပြထားသည်။ မဿဲကလည်း ဤဖြစ်စဥ်သည် ဟေရှာယ (၇၅၀ ဘီစီအီး) မှ ပရောဖက်ပြုချက်တစ်ခု၏ ပြည့်စုံချက်ဖြစ်ကြောင်းကို အခိုင်အမာဆိုခဲ့သည်။ ယင်းပရောဖက်ပြုချက်မှာ-

“ဘုရားရှင်ကိုယ်တော်တိုင် သင်တို့အား နိမိတ်လက္ခဏာပေးတော်မူမည်။ ကြည့်ရှုလော့။ အပျိုကညာသည် သန္ဓေတည်၍ သားယောက်ျားကိုဖွားမြင်လိမ့်မည်။ ထိုသား၏အမည်ကို ဧမာနွေလဟုခေါ်ကြလိမ့်မည်။” ဟေရှာယ 7:14 (မဿဲ 1:23 ၌ကိုးကား)

မဿဲ၏ အဓိပ္ပာယ်ထွက်ဆိုမှုသည် နားလည်မှုလွဲခြင်းဖြစ်နိုင်သည်။ မူရင်း ဟေဗြဲဘာသာစကား ဟာအီလ်မာဟ် (အသံထွက် ဟာလ်မာ ) သည် ‘အပျို’ ဟုအဓိပ္ပာယ်ရနိုင်သလို လက်မထပ်ရသေးသော အမျိုးသမီးငယ်ဟုလည်း အဓိပ္ပာယ်ရသည်။ ဘီစီ ၇၅၀ မှာ ဟေရှာယပြောခဲ့ခြင်းသည် လက်မထပ်ရသေးသော အမျိုးသမီးငယ်ဟု ဆိုလိုခြင်းသာ ဖြစ်နိုင်သည်။ မဿဲနှင့် လုကာတို့သည် ယေရှုအား ကြည်ညိုရန် ဘာသာရေးအရ လိုအပ်ချက်ကြောင့်သာ ဟေရှာယ၏ ‘မိန်းမငယ်’ ဟု ဆိုလိုရင်းကို ‘အပျို’ ဟု အထင်လွဲခဲ့ကြခြင်း ဖြစ်နိုင်သည်။ အိမ်ထောင်မပြုမီ မာရိ၏ ကံဆိုးစွာရခဲ့သော ကိုယ်ဝန်ကို ဆင်ခြင်ကြည့်လျှင် ယေရှုမွေးဖွားချိန်တွင် ‘မြင့်မြတ်သော ပရောဖက် ပြည့်စုံခြင်း’ အဖြစ်သို့ ပြောင်းလဲသွားခြင်းလည်းဖြစ်နိုင်သည်။

စက်ပ်တွားဂျင့်၏သက်သေခံ

Matthias Stom ၏ “သိုးထိန်းများ၏ ကိုးကွယ်ဆည်းကပ်ခြင်း”_{^{Matthias Stom, Public domain, via Wikimedia Commons}}

တချို့လူများကလည်း တစ်စုံတစ်ယောက်သည် အပျို ဟုတ်မဟုတ်ကို သက်သေပြရန် မဖြစ်နိုင်သောကြောင့် ယေရှု၏ ပရောဖက်ပြည့်ဝခြင်းကို ချေပ၍မရပါဟုလည်း ဆိုကြပြန်သည်။ ဒါပေမယ့် ဒီရှင်းပြချက်က ရိုးရှင်းလွန်းတယ်။ ဂျူးရဗ္ဗိများသည် ဘီစီ 250 ခန့်တွင် ဟေဗြဲဓမ္မဟောင်းကျမ်းကို ဂရိဘာသာသို့ ပြန်ဆိုခဲ့သည်။ ဓမ္မဟောင်းကျမ်း၏ ဂရိဘာသာပြန်ကို စက်ပ်တွားဂျင့် ဟုခေါ်သည် ။ ယေရှု အသက်ရှင်တော်မမူမီ အနှစ်နှစ်ရာငါးဆယ်တွင် ဂျူးရဗ္ဗိများက ဟေရှာယ ၇:၁၄ ကိုဘာသာပြန်ဆိုခဲ့ကြသည်။ ဤဂျူးရဗ္ဗိများသည် ဟေရှာယ ၇:၁၄ ကို ဟေဗြဲဘာသာမှ ဂရိသို့ မည်သို့ဘာသာပြန်ဆိုခဲ့သနည်း။ ‘မိန်းမငယ်’ သို့မဟုတ် ‘အပျိုစင်’ ဟု ဘာသာပြန်ခဲ့ပါသလား။ မူရင်း ဟေဗြဲဘာသာစကား עַלְמָ֗ה သည် ‘မိန်းမပျို’ သို့မဟုတ် ‘အပျိုစင်’ ဟု အဓိပ္ပာယ်ရနိုင်ကြောင်း လူတော်တော်များများသိကြသည်။ သို့သော် လူအနည်းငယ်ကသာ စက်ပ်တွားဂျင့်တွင် ယင်းစကားလုံးကို παρθένος ( အသံထွက် parthenos ) ဟုဘာသာပြန်ဆိုထားကြောင်းကို ပြောလေ့ရှိကြသည်။

တစ်နည်းဆိုရသော်၊ ၂၅၀ ဘီစီအီးတွင် ထိပ်တန်း ပညာရှိဂျူးရဗ္ဗိများက ယေရှုမမွေးဖွားမီ အနှစ်နှစ်ရာကျော်ကပင် ‘ဟေဗြဲဟေရှာယပရောဖက်ပြုချက်ကို ‘အပျိုစင်’ ဟု နားလည်ခဲ့ကြောင်း သိမြင်နိုင်သည်။ ထို့ကြောင့် ကျမ်းသစ်ရေးသူများနှင့် အစောပိုင်းခရစ်ယာန်များက အပျိုစင်မွေးဖွားခြင်းကို တီထွင်ရေးသားခဲ့ခြင်း မဟုတ်ပေ။ ဤအချက်သည် ယေရှုကြွမလာခင်ကတည်းကပင် ဂျူးလူမျိုးများ၏ တွေးခေါ်မှုထဲမှာပါဝင်ပြီးဖြစ်သည်။

အပျိုကညာဆိုလိုချက်နှင့် ပတ်သတ်၍ ရဗ္ဗိတို့၏ ပြောဆိုချက်

ဘီစီ 250 တွင် ဂျူးရဗ္ဗိများကအပျိုစင်တစ်ဦးတွင် သားတစ်ယောက်ရှိခြင်းအကြောင်းကို အဘယ်ကြောင့် ဘာသာပြန်ပရောဖက်ပြုခဲ့ကြသနည်း။ သင့်အနေဖြင့် သည်အဆိုပြုချက်သည် အယူသီးပြီး သိပ္ပံနည်းမကျနိုင်ပါဟု ထင်မြင်နေပါက ဤသို့ စဥ်းစားကြည့်ပါ။ ထိုခေတ်ကလူများသည် လယ်သမားများဖြစ်သောကြောင့် တိရစ္ဆာန်များ မျိုးဖောက် မျိုးပွားမှုကို တတ်ကျွမ်းကြသည်။ စက်ပ်တွားဂျင့်မရေးသားမီ လွန်ခဲ့သော နှစ်ရာပေါင်းများစွာကပင် အာဗြဟံသည် အမျိုးသမီးများအနေဖြင့် အသက်အရွယ်တစ်ခုတွင် သွေးဆုံးပြီးနောက် ကလေးမွေးဖွားရန် မဖြစ်နိုင်ကြောင်း သိရှိခဲ့သည် ။ ဘီစီ ၂၅၀ မှ ရဗ္ဗိများသည် ခေတ်မီဓာတုဗေဒနှင့် ရူပဗေဒတို့ကို မသိခဲ့ကြသော်လည်း တိရစ္ဆာန်များနှင့် လူတို့ မျိုးပွားပုံကို နားလည်ကြသည်။ သူတို့အနေဖြင့် အပျိုတဦးမှ ရင်သွေးမွေးဖွားခြင်း မဖြစ်နိုင်ကြောင်းကို သိရှိကြသည်။ သို့သော်ငြား ၎င်းတို့သည် စက်ပ်တွားဂျင့်ကျမ်းတွင်မူ ‘မိန်းမငယ်’ ဟု ဘာသာပြန်ဆိုခြင်းမပြုခဲ့ပဲ ကွက်ကွက်ကွင်းကွင်း အပျိုကညာ မှာ သားတစ်ယောက်ရမယ်ဆိုသည့်အကြောင်း ဖော်ပြခဲ့ကြပေသည်။

မာရိ၏ အကြောင်းခြင်းရာ

ပရောဖက်ပြည့်ဝခြင်း အကြောင်းကို ကျွန်ုပ်တို့ သုံးသပ်ကြည့်ရအောင်။ မာရိသည် အပျိုစင်ဖြစ်ကြောင်း မည်သူမျှ သက်သေမပြနိုင်ပါ။ သို့သော်ငြား ဓမ္မသစ်ကျမ်းရေးသားခဲ့သော ကာလသည် မိသားစုကြီးများ ပေါများသောခေတ်ဖြစ်သည်။ မိသားစုတစုလျှင် ကလေးဆယ်ယောက်ထွန်းကားခြင်းမှာ မထူးဆန်းသော အချိန်ဖြစ်သည်။ ထို့ကြောင့် ယင်းကာလတွင် ယေရှုသည် မိသားစုထဲတွင် အသက်ကြီးဆုံးသော ကလေးဖြစ်နိုင်သည့် ရာခိုင်နှုန်းမည်မျှရှိမည်နည်း။ ယေရှုတွင် အစ်ကိုကြီး သို့မဟုတ် အစ်မကြီး ရှိခဲ့ပါမူ မာရိသည် အပျိုမဟုတ်မှန်း ကျွန်ုပ်တို့ သေချာပေါက် သိနိုင်မည်ဖြစ်သည်။ ယနေ့ခေတ် မိသားစုတခုတွင် ကလေး ၂ ယောက်လောက် ထွန်းကားလေ့ရှိသော ကာလတွင် ဤဖြစ်နိုင်ခြေသည် ၅၀-၅၀ ဖြစ်သည်၊ ရှေးယခင်ခေတ် ကလေး ၁၀ ယောက် ထွန်းကားသော ကာလတွင်မူ ဤဖြစ်နိုင်ခြေသည် ၁၀ ပုံ ၁ ပုံသာဖြစ်သည်။ ယေရှူတွင် မောင်နှမသားချင်းရှိရုံမျှဖြင့် မေရိ၏ အပျိုစင် ပရောဖက်ပြည့်ဝစေမှု လွဲမှားသွားစေနိုင်သော အခွင့်အရေးသည် ၁၀ ပုံ ၉ ပုံ ရှိသော်လည်း ယေရှုသည် ယင်းဖြစ်နိုင်ချေများနှင့် ဆန့်ကျင်၍ တဦးတည်းသော ရင်သွေးအဖြစ် ဖွားမြင်ခဲ့သည်။

ယခု မာရိ ၏ ထူးခြားသောစေ့စပ်ထားမှုနှင့်ပတ်သတ်၍လည်း ဆင်ခြင်ကြည့်ပါ။ အကယ်၍ သူမသည် ရက်အနည်းငယ်ကြာပင် အိမ်ထောင်ပြုခဲ့ပါသော် အပျိုကညာ ပရောဖက်ပြုခြင်းကို ငြင်းပယ်နိုင်မည်ဖြစ်သည်။ တစ်ဖက်တွင်မူ စေ့စပ်ခြင်းမပြုသေးသည့်အချိန်၌ ကိုယ်ဝန်ရှိလာပါက သူမအား ပြုစုစောင့်ရှောက်ရန် စေ့စပ်ထားသူရှိမည်မဟုတ်ပေ။ ထိုခေတ်ယဉ်ကျေးမှုအရ ကိုယ်ဝန်ရှိသော်လည်း စေ့စပ်ထားသူမရှိ တကိုယ်တည်းနေထိုင်ရသည့် မိန်းမငယ်ဖြစ်နေပါမူ သူ့အနေဖြင့် တယောက်တည်း နေထိုင်နေရမည်ဖြစ်သည်။

Sassoferrato ၏ “The Virgin in Prayer”_{^{Giovanni Battista Salvi da Sassoferrato, Public domain, via Wikimedia Commons}}

ကျွန်ုပ်အား အံ့အားသင့်စေသည်မှာ အထက်ဖော်ပြပါ အချက်များကဲ့သို့ အပျိုစင် ရင်သွေးမွေးဖွားခြင်းကို မဖြစ်နိုင်ပါဟု ငြင်းပယ်ခွင့်မပြုသည့် ထူးခြားပြီး ဖြစ်နိုင်ချေမရှိသည့် ‘တိုက်ဆိုင်မှုများ’ ဖြစ်သည်။ ဒီတိုက်ဆိုင်မှုတွေဟာ မျှော်မှန်းထားလို့ရတဲ့ အရာတွေလည်း ဟုတ်မနေပါဘူး။ တနည်းအားဖြင့် အရာအားလုံးကို မျှမျှတတ အချိန်ကိုက် တန်ခိုးနာမ်တော်က အစီအစဥ်တကျ ရည်ရွယ်ချက်ရှိရှိ ဖန်တီးနေသလိုပါပဲ။

ရဗ္ဗိကျမ်းစာများ၏ သက်သေ

မာရိသည် ယေရှုမမွေးမီက အိမ်ထောင်ပြုခဲ့လျှင် သို့မဟုတ် ယေရှုတွင် အခြားသော မွေးချင်းများရှိခဲ့ပါက၊ ရန်လိုသောသက်သေဖြစ်သည့် ဂျူးများက ယင်းအချက်ကို သေချာပေါက် ထောက်ပြကြပေမည်။

သို့သော် ပညာရှင် F.F. Bruce ၏ ဖော်ပြချက်အရ ရဗ္ဗိကျမ်းစာများသည်လည်း ဓမ္မသစ်ကျမ်းစာရေးသူများနှင့်အလားတူ အပျိုစင်မွေးဖွားမှုအကြောင်း သဘောတူထားသည်ကို တွေ့မြင်နိုင်သည်။ F.F. Bruce က ထိုအကြောင်းကို ယေရှုအား ရဗ္ဗိတို့၏ ကျမ်းစာများတွင် ဖော်ပြထားပုံနှင့် စပ်လျဥ်း၍ ရေးသားထားခြင်းဖြစ်သည်။

ယေရှုကို ရဗ္ဗိစာပေများတွင် Jesus Ben Pantera သို့မဟုတ် Ben Pandira ဟုရည်ညွှန်းသည် ။ ၎င်းသည် ‘ကျားနက်၏သား’ ဟု အဓိပ္ပာယ်သတ်မှတ်နိုင်သည်။ အခြားဖြစ်နိုင်ခြေတခုမှာ Pantera သည် ‘အပျိုစင်’ ဟူသော ဂရိစကားလုံး Parthenos မှဆင်းသက်လာပြီး အပျိုစင်၏သားအဖြစ် ခရစ်ယာန်အခေါ်အဝေါ်မှ ပြောင်းလဲလာခြင်လည်းဖြစ်နိုင်သည်။ (p. 57-58)

ယနေ့ခေတ်တွင် ယေရှူခေတ််နှင့် အလားတူ ယေရှုနှင့် ဧဝံဂေလိတရားအပေါ်တွင် အပြင်းအထန် ရန်လိုမှုများရှိပေသည်။ သို့သော် ကွားခြားချက်မှာ ထိုအချိန်က ရန်လိုသော သက်သေများ ရှိခဲ့ပြီး ၄င်းသက်သေများသည် အထက်တွင် ဖော်ပြခဲ့သည့် ငြင်းပယ်နိုင်သော အချက်အလက်များသည် မှားယွင်းစွာ ဖန်တီးခဲ့ခြင်း ဖြစ်နေပါမူ ယင်းအချက်အလက်တို့ကို ငြင်းပယ်နိုင်သော်လည်း ငြင်းဆိုခြင်း မပြုခဲ့ကြောင်းကို တွေ့မြင်နိုင်သည်။